高登網友以個人經驗針對某大傳銷黨行騙的弱點，用一個詳細的解釋去指示受害者如何討回賠償。雖然其方法針對的情況有局限，但始終是高登首次有網友提出具體方案對付之。
亂膠派對總結教受害人點樣向上線索取賠償[]
第一篇: 背景解釋[]
首先我要講明我的方法並不適用於每一個傳銷受害人. 如果幫唔倒你或你親友就真係唔好意思. 但作者用這個方法的確於三日內幫朋友取回幾萬蚊.
我發現原來而家o的傳銷黨好鍾意註冊o的公司去做傳銷會員. 假設我係一個傳銷黨的上線, 我想買六萬幾蚊貨去升級. 我可以註冊一間有限公司成為他的下線, 再用該公司名義買貨. 咁樣做o既好處係有朝一日有水魚下線要加入但又唔夠錢的話, 我就可以教(或搵我其他下線”提醒”)個受害人搵我”扶一扶”佢. 我就可以將呢間公司賣俾個下線, 等個受害人下線可以先升級後付款(當然簽晒合約借據). 同埋要肯定呢個將來有付款能力(即Grant Loan就快到手, 搵倒工有Employment Contract可以去借財仔之類). 但係正式法律手續我唔會做足甚至冒個受害人下線簽名. 而且文件唔會俾足個下線.
上線點解要開公司?
最大o既好處係呢間註冊返o黎o既公司o既貨額係一早過晒退款期. 咁即係話就算個受害人之後清醒o左都唔可以用14-90日退款呢個條款去回水. 咁樣我呢個上線就可以將O的佣金袋袋平安. 如果受害人清醒之時我又可以用超低價向受害人買返間公司.
點解唔做足法律手續?
因為做足晒o的手續的話個成本好貴, 就算搵最平o既會計師同商務中心由成立間公司到轉名都要大約七千蚊. 咁樣我呢個上線o既佣金就間接分o左好多俾會計.
點解要冒個受害人下線簽名? 點解要唔俾足文件個下線?
如果我個下線冇錢俾尾數的話我可以將間公司轉返去自己名度. 反正個受害人一早已經俾我洗晒腦. 我講乜做乜佢都信晒我.
第二篇: 心理調整[]
其實傳銷黨並不如一般人所想的高明. 在我成功為我朋友討回款項的過程中我深深地體會到這一點. 所以受害人必須要積極面對.
受害人要記住:
1) 你唔堅持就一毫子都不能取回, 堅持就有機會拿回合理賠償或能夠將害你o既人繩之於法, 等佢唔可以再害其他人.
2) 反正你錢都俾人呃o左! 你已經衰到貼晒地! 已經冇o既可以再輸, 根本係爛命一條.
3) 你個上線只係一個不學無術o既騙子, 只要有真正專業人士幫你, 你上線根本冇唔係專業人士o既對手. 所以你必定要向專業人士求助.
4) 受騙並不可恥, 騙子才最可恥. 我朋友去某立法會議員求助時發現同一周內有三個大學畢業生中招.
有咩人可以幫倒你?
1) 睇睇有冇親戚朋友係做律師和會計師. 就算冇睇o下有冇朋友o既朋友或朋友o既親戚係做呢兩樣o野. 我朋友都係冇呢兩樣朋友, 但係佢朋友(即係作者)係有個律師親戚, 結果就成功o左.
2) 本身係律師o既民主派立法會議員. 亦都同時搵多一個本身係律師或會計師o既區議員俾多個意見你
第三篇: 採取行動[]
還記得上線賣間公司俾你或幫你成立了一間公司嗎? 其實買賣公司正常一般人都會上公司註冊處查冊. 並唔係難做的事, 識字就可以去做而且手續費只係一百幾十. 所以受害人第一步要做的事 － 查冊
首先去金鐘政府合署十三樓度查冊(可以網上做, 但我會極度建議你親身上去, 因為o個度o的職員可以解答倒你好多問題), 而且查個冊影埋印都係一百幾十. 引用Sir Lau名句: O係街乞都乞倒.
點解要查冊?
因為我覺得o的傳銷黨十個著o左九個係表面好風光, 其實係窮到燶. 佢o地只會搵o的最cheap的商務中心及會計師去幫佢o地買o的空殼公司去用o黎去搵受害人著數. 而佢o地為o左省錢好多時候冇根足香港o既法律去做足每一步(見第一篇), 所以呢o的死人空殼公司o的註冊資料係不清不楚o既.
去查冊可以睇o下個上線:
1) 有冇做足文件, 如Annual Return之類
2) 所謂賣俾你係咪只係呈交了一頁文件(該文件叫D2A - 秘書及董事更改通知書(委任/離任))將你寫成公司董事Director? 如果你上線係話賣成間公司俾你但又冇做倒股權轉讓. 咁樣已經可能係犯法. (在公司註冊處未必查倒, 下文會教你點做) 法理上你有理由相信個上線係不誠實, 呢點對你好有利.
3) 搵佢手上其他公司o既痛腳, 有冇交足年報? 有冇搵核數師報稅之類? 傳銷人多數為o左慳錢或者真係唔識而會有好多痛腳俾你揸倒.
4) 最重要o既就係睇受害人有冇俾人冒簽. 冒簽係偽造文件罪, 最高刑罰係十四年監禁. 根據政府網頁度所講, 入罪率平均大約係每年95%
由高登網友 “多謝支持_/我今日番青山”提供
http://www.legislation.gov.hk/blis_ind.nsf/E1BF50C09A33D3DC482564840019D2F4/B0CE4018586D99B3C8256483003223A9?OpenDocument
將o的文件交俾幫你o既律師+會計師+議員睇, 睇o下有咩犯法o野.
第四篇: 射人先射馬[]
當你發現查册文件有問題. 第二步就係o係o的文件(13樓度印返o黎o個o的)度搵個所謂"會計師"出o黎. 搵一兩個聲大夾惡o既親戚朋友陪你上去. 之前就扮晒冇o野咁打上去個“會計師”度話你係邊間公司個新董事, 想上去加埋你親戚個名上間公司度. 但當佢一拿o的文件或唔肯拿o的文件出o黎時即刻發圍.
你只要當正呢班人同上線蛇鼠一窩. 拍枱大吵大鬧, 話佢夾埋你上線偽造文件/詐騙. 又話要報警又話報老廉之類. 要佢交代晒o個間公司o的股權, Annual Return等文件. 口頭應承如果你發現佢冇份騙你, 你會考慮放過佢之類.
咁做有咩用?
因為會計師樓個制度係一人出事, 全間公司所有合伙人都會有事. 而且會計師呢一門生意一俾警察/廉記查, 就算冇事以後都好難做生意. 佢應該只係賺你上線一千幾百, 唔會幫個上線搵命搏. 所以佢會向你上線施壓, 亦唔敢再幫你上線做o野亦唔敢幫佢隱瞞. 你就可以有更多武器對付你上線.
第五篇: 專業人士[]
當你搵齊晒o的公司註冊文件, 就應該再搵律師 + 會計師 + 議員睇o下有咩漏洞. 呢一步真係要搵真正專業人士, 真係攪唔掂o既就搵民主派立法會議員. 佢會介紹o的可靠又收費平o既律師俾你(立法會議員律師一定好貴)
點解要搵本身係律師o既民主派立法會議員?
1) 立法會議員有質問高官o既特權, 仲要係出名律師. 唔打得都嚇得
2) 上線唔敢對你不利, 因為有立法會議員照住, 攪律師議員係連特首都會出手
3) 你真係報警的話, 你撻個議員朵, 警察會敢唔交足功夫?
4) 佢幫你搵埋平律師
5) 民主派議員形象較正義, o的做衰o野o既人會心虛o的
6) 有咩依郁, 佢可以幫你搵埋記者
如果發現有任何違法行為, 咁就成為你o既武器.
打去差館問清楚商業罪案調查科地點o係邊同辦公時間. 問埋負責傳銷個阿sir姓乜. (之後話唔該晒你阿Sir/Madam, 我會認真考慮o下是否上o黎報案. 跟住收線)
第六篇: 如何攤牌[]
即刻打電話俾你上線同佢講邊個立法會議員而家幫o緊你. 佢查倒咁咁咁咩咩咩. 頭先佢叫我報警, 仲想搵埋記者. 但免得過我唔想見報. 我只係想退回我o既錢o者! 我而家俾兩個小時你考慮, 我約o左灣仔差館商業罪案調查科X Sir/Madam兩個半鐘頭後上灣仔差館.
當然個上線會無所不用其極想說服你. 你就不停重覆講:
1) 我理得你死! 你死好過我死!
2) 我有立法局議員撐我! 你夠薑就攪我!
3) 律師話你坐梗, 法庭會判返o的錢俾!
4) 灣仔差館商業罪案調查科x Sir/Madam頭先不知幾高興今次有受害人有晒證據, 佢一定幫我釘死你.
兩個鐘後你就真係走去差館門口, 最好用3G俾佢睇倒你真係企o係灣仔差館門口. 俾個最後通碟佢. 如果上線仲支唔以對就真係開住電話行入去差館報案室問: “商業罪案調查科幾樓呀?”
佢真係都仲唔屈服你就cut佢線. 之後去個廁所. 俾多十五分鐘佢如果都仲唔打o黎你就真係上去報警.
以我有限的法律知識 (有錯歡迎指正)
1955年有個案例 Strongman Ltd v. Sincook, C.A. (Contract law的textbook case, 所謂Illegal as performed).
有一個判頭同建築師有個合約, 建築師應承另一方會攪晒所有牌照但係又冇做到. 法庭判合約無效, 並判建築師要負責賠償判頭的損失.
因為你上線應承會幫你攪晒所有公司轉讓的手續(段估會有應承), 而你之前又去兇o左個"會計師", "會計師"必定會出賣你上線將一切責任推晒去佢身上! (唔通會為少少錢幫你上線犯法咩?) 到時所有證據都會指向你上線
希望呢個案例幫倒你.
第七篇: 善後工作[]
如果你上線屈服. 你就同佢傾幾時俾錢. 最好限定一個時間.
[red]記住: 冇律師/會計師點頭唔好簽任何文件.
亦絕對唔好自己去公司註冊署file任何文件. 要你上線自己攪掂佢. [/red]
你可以話: 我當我唔知你冒我簽名. 總之我遲o的去再查冊, 如果到時仲見倒我係o個間公司董事我就即刻報警. 我唔會認任我知任何有關呢一間公司o既o野, 如果第日有咩事我一定篤你出o黎! 以後我有咩頭昏身慶全部入晒你數!
點解要咁做?
呢個就係佢呢世都o係你手上o既痛腳. 佢呢一世都唔敢再攪你. 就算有朝一日稅局查你(事實上如果冇人報案邊有咁得閒會查?)都可以推晒落你上線度.
最後當然係自動自覺上去多謝個議員同埋主動要求做助選員.
後記[]
有人唔少人問我寫呢篇文會唔會教精o左o的傳銷黨?
我o係度講一定唔會!
因為由我朋友打俾佢上線攤牌後, 我肯定傳銷公司高層已經知呢件事, 我寫出o黎並唔會助長傳銷黨行兇
但係我寫出o黎就可能令到睇倒呢篇文o既受害人得到幫助.
而且最重要係商業登記資料係不能清除的. 傳銷黨幾時都可能被受害人清算.
我希望有多o的受害人追究, 將有做過壞事o既傳銷黨繩之於法.
香港高登網民寫於2006年11月
原作者為高登網民