香港網絡大典
註冊
Advertisement

我今日搭東鐵比成班痴線佬偷拍,但係黨鐵唔會處理潮文,又稱MMR清潮文,為NSS secrets於3月31日發佈的潮文,針對鐵路迷拍攝港鐵東鐵綫現已退役之中期翻新列車(MLR-Train)。該潮文受到廣大巴士及鐵路迷批評。本潮文中,MMR實為MLR之誤寫。

原文[]

唔知大家有冇體驗過,由上年開始,黨鐵就慢慢係東鐵度將啲12卡車改造成9卡車,話乜因為過海喎。車廂就越嚟越短,班次又冇加密到,搞到越嚟越迫。真係唔知邊個聰明決定要將啲12卡車拎去改造成9卡車。

是咁的,今日搭車返屋企,咁啱就嚟咗㗎12卡,應該冇咁迫啦,點知一上車就見到成班痴線佬係架車度影相拍片,有啲仲揸住成支mic。我就怕有人偷拍我啦,所以我全程都提心吊膽,根本冇得休息。大佬呀,架車咁鬼嘈又咁鬼震,邊可能拍到好嘅片架?仲有呀,架車咁鬼嘈,有乜好錄音?

之後嘅事仲痴線,沿途每個站同路段之間,都有班人攞住支相機影相,唔該你唔好影到我呀,我唔想比你影呀,雖然我知戴左口罩會靚女啲,但係我又唔識你,點解俾你影我呀?

於是我就係我落車個站去月台捉班痴線鹹濕佬啦,點知佢竟然話佢唔係影我,仲話我阻住佢影相。痴線架,條友仲諗住去偷拍其他女仔呀!我當然要實行公義,要將佢依法處理,交左佢比站長,站長就叫佢比我哋睇佢影咗啲乜。哇,全部都係火車嚟嘅?你扮嘢都扮得好啲啦,點會有人影啲成隻烏龜樣嘅火車呀?仲要大部份相都係烏龜樣車頭嘅火車,偷拍地點由車站到郊區,簡直係專業色狼。之後佢仲話:”呢啲係MMR清,啫係12卡車嘅相,佢哋就嚟退役,所以我咪過嚟影相記錄下囉。”聽完之後我真係哇左一聲,大話都唔該作得好啲啊,佢哋去車廠改造,掹走咗4卡車變成9卡車咋喎,都唔係退役,你唔好覺得我係傻架啦,偷拍就係偷拍。最令我煩惱嘅係,個站長竟然放過佢,大佬呀,而家證據確鑿喎,佢真係喺度偷拍呀,點解唔拉佢呀?

所以我在此呼籲,各位女士搭東鐵千祈唔好坐12卡嘅MMR清,小心比人偷拍,因為垃圾黨鐵係會放生班鹹濕佬架。

網民反應及後續[]

大批網民的留言都是在批評樓主(實際上是投稿人),包括批評NSS Secrets,包括要求NSS Secrets「請他們尊重該圈子」。NSS Secrets 管理員 Admin Y 事後表示「投稿言論不代表NSS立場」,並請求網民發怒的時候不要向NSS Secrets發洩。

網民Oscar Wai事後於4月1日上載配音版。[1]

相關條目[]

參考來源[]

  1. https://youtu.be/F6W5PvTwJVk 【OW配音】我今日搭東鐵比成班痴線佬偷拍,但係黨鐵唔會處理潮文
Advertisement