香港網絡大典
註冊
Advertisement

撈麵潮文」源出有高登討論區網民疑問於一般廣東麵檔中,隨撈麵會奉上清湯一碗的做法。[1]網民將此連結至飲食傳統以至明歷史,創作出風格截然不同的潮文。

「一乾三濕」版[]

「一乾三濕」由「牟中三」(高登會員編號:298918) 所作,是首篇關於撈麵的潮文。該文一開頭用字十分認真,極似行內術語,因此網民通常讀到最後方知中伏

呢個係舊時廣東人o既傳統

以前d面店講o既係「一乾三濕」
即係麵、湯、茶、汁 四樣
無論你食雲吞麵 雲吞撈麵 都一定要上齊呢四樣
如果你食撈麵 最正宗最傳統o既食法應該係先飲茶漱口
之後加醬油落兜湯度 食幾啖麵 含一啖湯
一野噴落個小二身上
「hi! 咁難食點食呀! 」

咁個店家就知你係行家 會打番個7折比你

「一乾三濕」認真版[]

多年後,「三聯幫牟中三」(高登會員編號:298918) (前名「牟中三」)面對自己當年造成的謠言,鬱結難解,深感後悔,打算自己查出真相。多番查探後結果仍是中伏[2]

話說當年有高登仔問點解食雲吞撈會送碗湯,

當時無無聊聊嘅我忍唔住留咗個言:
「呢個係舊時廣東人o既傳統
以前d面店講o既係「一乾三濕」
即係麵、湯、茶、汁 四樣
無論你食雲吞麵 雲吞撈麵 都一定要上齊呢四樣
如果你食撈麵 最正宗最傳統o既食法應該係先飲茶漱口
之後加醬油落兜湯度 食幾啖麵 含一啖湯
一野噴落個小二身上
「Hi! 咁難食點食呀! 」
咁個店家就知你係行家 會打番個7折比你」

少不更事嘅我無估到高登威力咁大,直到後來我認真想搵個起源,
仆你個街搵嚟搵去都係搵返呢篇嘢,連OPEN RICE都有人用「一乾三濕」呢個Term,
我真係好後悔,兜出公海竟然中返自己伏,
所以我決定認真去搵返呢個起源出嚟。

我嚴選咗兩間香港都幾出名嘅雲吞麵店,膽粗粗食完麵問下鋪頭啲人,
第一間係深水埗,當我問完呢個問題後,阿姐不耐煩地望咗我一眼,
「咁你係咪唔飲呀?」佢一手已經拎住我碗湯,
「唔係,我想問點解會有呢碗湯啫。」
「撈麵咪有囉!」阿姐大大聲答我,
「咁點解撈麵會有碗湯嘅?有冇咩歷史典故咁架?」
阿姐靜默幾秒,好似望住個精神病人咁呆望住我,
「咁你係咪唔飲呀?」佢又拎住我碗湯,
就係咁,我無謂同阿姐無限Loop落去,俾錢就走佬。

第二間係元朗,聽講仲好老字號,果然裡面裝修都好似回到七十年代,
麵店入面啲師傅真係一睇就知係新界原居民,
通常阿叔特別多嘢講,仲懶係連張檯都吹到啲典故,
於是我走埋去,深吸一口氣,
「唔好意思,我想問呢,點解食撈麵一定會送碗湯嘅?」
個阿叔抬起頭望我,頸上條金鏈仲粗過我條皮帶,
「撈麵乾,咪俾湯你濕濕個嘴囉!」
「咁呢個整法有冇話咩典故,或者幾時開始有呢個傳統?」
「我八歲開始跟我阿叔整麵,貢多年都係咁架啦!」阿叔開始有啲唔耐煩,
「係咪潮州麵先會有呢個傳統?」我死纏佢唔放,
阿叔望住我,個樣有少少燥底,
「你去食茶記、食西餐夠有杯茶俾你啦,你唔問下佢有咩典故?!」
我一呆,心諗阿叔又有啲道理,
之後我就俾個阿叔趕走咗。

連問兩個麵店都係咁嘅結果,我開始懷疑,呢個根本就係一個傻的嗎問題,
挑,人地口乾咪問人攞碗湯囉!邊嚟咁多故仔呀!
一諗到自己又Seven咗,我就有啲唔開心,
行行下我又行入咗間雲吞麵店,我雙目無神地點咗個雲吞撈粗,
MK造型嘅店小二扔咗碟麵俾我,我茫然地望住兜麵,
我睇唔透,究竟呢兜純粹係一兜普通麵,定係一兜有情有義有血有肉嘅絕世好麵,
「究竟……….撈麵呢碗湯係點嚟嘅……」我自言自語,
MK仔聞言望向我,然後露出一個笑容,
「你係今日第三個問我呢個問題。」MK仔突然有種莫測高深嘅感覺,
「願聞其詳!」我興奮地說,

「嗱,呢個係舊時廣東人o既傳統,以前d面店講o既係「一乾三濕」…………」

利瑪竇版[]

利瑪竇版在原帖中由「痴膠線的少年」(高登會員編號:245715)提供。由於有關歷史似是而非,令不少真心網民入信,更曾一度被收入維基百科的「拌麵」條目。[3][4]

意大利籍神父利瑪竇明末來華傳教

早期多活躍於澳門及廣州一帶
由於意大利粉一般不附湯
利瑪竇神父對華南麵食文化不太接受
於是每次出外用餐,點選湯麵時多會要求店家將麵和湯分開送上
乾麵上桌後再混以肉碎、蠔油或豉油加以調製作肉醬意粉狀,是為對家鄉菜的思念
利瑪竇的食法後來被廣傳開去,民間爭相仿傚,稱為"鬼佬麵",亦即粵人第一代"鬼佬西餐"
由於忌諱,粵人後來把鬼字刪除成為今日兩廣一帶稱呼的"撈麵"
店家雖多不理解利瑪竇不喝湯的背後原意,但一般仍然會奉送清湯,以示本店乃正宗利瑪竇食法
清湯伴撈麵另上成為明末廣州高格調食店的象徵
後因滿清乾隆修定"四庫全書","清湯"一詞有眨滿清之意而故事被刪去
致有關記載盡失,只剩小部份老廣州以口耳相傳方式流傳典故

但撈麵造法流傳至今

袁崇煥版[]

袁崇煥版由「脹根碩」(高登會員編號:128468)另開新帖所作,因此流傳程度未有前兩篇廣泛。[5]

明末袁崇煥鎮守遼東拒

相傳袁雖為文人﹐卻愛兵如子
與清軍交戰雖有報捷﹐但每聽到軍士死傷都是哀慟不已
由於軍中禁酒
袁就令伙頭把軍中慣常食糧清湯泡麵餅的麵與湯分開上﹐麵條只以油﹑鹽﹑蔥撈拌吃﹐
清湯則當作酒灑在地上祭奠死去的兵士
當時軍中將領對袁此舉甚為相敬﹐多有仿傚
後來袁被崇禎所殺﹐其舊部中有同鄉回到廣東就將這軍中習俗帶到民間﹐以示對袁的懷念

而撈麵附上清湯的習慣自此就一直流傳至今

馬拉版[]

Mr.Buster (高登會員編號:397546)另有見解。[2]

認真,我都問過啲老字號,但係唔係香港果啲,係馬來西亞既。
佢地話撈麵係佢地創既,當年廣東人入左南洋,
天氣太熱,啲麵跟湯上就熱到食唔落口,咁就麵另上啦,麵另上又唔夠味,咁就落啲醬料撈下啲麵黎食。
但係以前雲吞麵啲湯係好比心機「拗」出黎,想啲人可以飲到佢地既心血結精,
咁就算啲人怕熱食乾撈,都會上埋湯,食完個麵,
啲湯就凍返少少可以飲得落

註解

外部連結[]

Advertisement