香港網絡大典
註冊
Advertisement

係我7歲果年買左一枝雪條,從此改變我既一生
當我奶到最後一啖好失落時,
枝棍竟然仲多兩條,唔洗講即刻去換黎食

我食完第二枝,吊,又中兩條;
而第三枝,又仲兩條!結果我再去換四條番黎
當我食完第五枝後,唔洗講,又中兩條,
但我已食唔落了,果次係我人生第一次食唔落雪條

我拎番第6~8枝番去比屋企人食,果然每枝再分別各中兩條
如是者我已經可以再換16條番黎,人生果然充滿希望
但當我拎番去比屋企人食完後,呢16枝又再各中兩枝,
我手上渣住16條可兌換32枝既雪條棍,我開始感到到d驚

今次我換完拎番去比同學食,中伏!!
每枝又獎多兩枝,即係64枝,
點算?我已幾乎請過晒我識既人食雪條了!
於是我請埋隔黎班食,但冇喇冇喇,再獎128枝,
7歲既我,要一次過拎128枝雪條係何其吃力

就咁樣捱左半年,
我手上仲有20736枝可換41472枝雪條既雪條棍,
我快要崩潰了!
難道我餘下既半生都只能活係雪條中嗎!?

轉眼到我24歲果年,
我已類積左3487459498594498枝一兌二既雪條棍,
為左搵地方擺雪條,
我將同女友同居新買既家私全部當晒,
再用錢去買雪櫃黎裝,
然後每個月女友一出糧就叫佢比晒錢我買雪櫃去裝,
但真係冇辦法!!
我搵錢買雪櫃既速度遠遠追唔上食雪條中雪條既速度!!!!

終於,係我26歲生日果日,女友離我而去,
佢一句話都冇同我講,
因為佢個咀已食雪條食到硬化唔講得野。
我好對佢唔住,
但人生...我又可以點?

呢年我全個家族因為不停買雪櫃而破產,
我家族本來係中古時期既貴族後裔,
d錢洗十世都用唔晒,但竟然落得如廝田地,
而且我仲有8千幾兆既雪條未換。
部分擺唔入雪櫃既雪條開始溶化,
d雪水浸到上我心口,
我好凍,凍到失去知覺...
就咁樣一訓,唔知訓左幾多年。

我醒番時掰大眼見到個呀伯,佢話有辦法幫我,
我問點樣,佢就話只要將我手上既雪條棍賣晒比佢,
佢就會開一間雪條公司賣雪條,
等人買左後再拎雪條棍黎換,

比如10個人買左10條,
走番黎獎20條,佢就前後清左30條;
果廿條再獎四十條,佢再比,又清多八十條...
如是者向全世界輻射出去,最終就會解脫到

我恍然大悟,一路多謝佢一路→即走,
走左成百米遠後我回頭問佢係咩人,
佢答我係瑞士人,叫亨利內斯特萊。

雀巢公司,就係佢成立。


疫情檢測版[]

由於武漢肺炎第五波疫情,因曾有確診者曾到檢測中心檢測,令其他同時段檢測人士墮入「無限檢測」輪迴,因此有人將此潮文改篇。

係我7歲果年做檢測,從此改變我既一生
當我撩到最後一下鬆一口氣時,
竟然收到訊息要做多6次,唔洗講即刻去檢測中心做

我做完第二次,吊,又要做多6次;
而第三次,又做多6次!結果我再去做第四次番黎
當我做完第五次之後,唔洗講,又中6次
但我已做唔落了,果次係我人生第一次鼻腔損晒流鼻血做唔落

我叫屋企人show我手機信息,但係用自己手機入檢測中心,俾第6~8次檢測屋企人去做,果然每個人分別各中6次
如是者我已經可以再做多48次番黎,人生果然充滿希望
但當我比屋企人做完後,呢48次又再各中6次
我手上渣住48部可兌換288次檢測嘅手提電話,我開始感到到d驚

今次我派手提電話比同學去做檢測,中伏!!
每個人又中6次,即係1,728次,
點算?我幾乎已經叫過曬我識既人去做檢測!
於是我請埋隔離學校去做檢測,冇喇冇喇,再中10,368次
7歲既我,要一次過做10,368次檢測係何其吃力

就咁樣捱左半年,
我手上仲有62,208部可換373,248次檢測嘅手提電話,

我快要崩潰了!
難道我餘下既半生都只能活係測檢中心嗎!?

轉眼到我24歲果年,
我已類積左2,902,376,448部一兌六嘅手提電話

為左搵地方擺手提電話,
我將同女友同居新買既家私全部當晒,
再用錢去買櫃黎裝,
然後每個月女友一出糧就叫佢比晒錢我交電話費去更新安心App,
但真係冇辦法!!
我搵錢交電話費既速度遠遠追唔上去檢測中心做檢測收訊息再做既速度!!!!

終於,係我26歲生日果日,女友離我而去,
佢一句話都冇同我講,
因為佢個鼻撩到穿咗整容都整唔返。
我好對佢唔住,
但人生...我又可以點?

呢年我全個家族因為幫我不停排隊做檢測而荒廢事業破產,
我家族本來係中古時期既貴族後裔,
d錢洗十世都用唔晒,但竟然落得如廝田地,
而且我仲有8千幾兆次嘅檢測未做。
部分手機收訊息太多而爆炸著火
d火燒到我身上,但係我忙緊做檢測,
我好熱,鼻哥好痛,痛到失去知覺...
就咁樣一訓,唔知訓左幾多年。

我醒番時掰大眼見到個呀伯,佢話有辦法幫我,
我問點樣,佢就話只要將我手上既手提電話賣晒比佢,
佢就會開一間檢測中心幫人做檢測,
等人黎做檢測個陣就換走佢部手機

比如10個人做左10次檢測
走番黎中多60次,佢就前後清左70次檢測
果60次中360次,佢再比,又清多2,160次
如是者向全世界輻射出去,最終就會解脫到

我恍然大悟,一路多謝佢一路→即走,
走左成百米遠後我回頭問佢係咩人,
佢答我係中国人,叫大大。

大大基因,就係佢成立。


外部連結[]


Advertisement