香港網絡大典
註冊
Advertisement

在2009年10月9日開始,香港討論區出現一位網民分享其朋友捉姦在床的慘事。事件瞬即為廣大網民所注意,並轉載至其他各大討論區

網民皆對男事主表示同情,而當男事主表示要把其樓房及儲蓄均分與其紅杏出牆的妻子,以求離婚時,廣大網民均表示異議,並且議論紛紛。

相關帖子曾多次被香港討論區移除,而男事主亦表示由於事件已交由律師處理,他不便再講太多,待事情告一段落時,才告知廣大網民結果。

發帖內容[]

第一帖[]

同朋友捉姦在床 真人真事、新鮮滾熱辣:

事發地點:天水圍某大型屋苑
時間:09-10-2009 零晨 3:00
事發經過:

原本我同個朋友兼同事尋晚要開通宵趕份 Project 明天開會用,
呢個開通頂既消息我地下晝 2:00 已經知道,
我個朋友即時打電話俾老婆話佢知要通宵,
咁一直做到 12 點幾上司打電話黎話個會取消,
咁我地仲唔拿拿聲閃咩,
小弟駕車送個朋友返屋企,
順便拎埋佢幫我買既魚竿,
去到佢屋企門口,無鐵閘得一度大門,
因為太夜既關係,同埋驚嘈醒佢老婆,
所以佢開門都好細聲,我亦都無出聲,
一入到屋第一時間聽到一對男女既對話聲,
仲以為佢老婆響度煲緊劇,
點知我個 Fd 一開房門就見到兩條肉蟲響張床度大戰,
但係我個 fd 第一個動作係關返度房門,
跟住坐左響廳既梳化,
一句聲都無去過,
2 分鐘之後我見到既係佢老婆同個姦夫行出黎,
我個 fd 竟然叫個姦夫走先,
果一刻我好尷尬我應唔應該都走呢?
但係我好驚我個 fd 唔知會做咩野出黎。
所以我決定走左入廚房等佢地自己解決問題。
其實內容我都唔係聽得好清楚,因為我開住左部抽油煙機吸支煙仔:
內容大致如下:

FD:點解你要咁做丫?
女:其實我未同你結婚已經同佢一齊,我地斷斷續續到依家。

FD:我同你結婚 2 年,2 年黎你都有同佢咩?
女:係。

FD:我辛辛苦苦做野,出糧成份糧俾晒你,我每日只係用 $50 蚊,你要乜就有乜,我仲對你唔好咩?唔怪得知每次我想做既時候,你都有籍口唔做喇,原來響出面食飽。
女:我知你對我好,係我對唔住你!

FD:我有年半無同你做愛,我都無去叫雞或者搵其他女人,我地離婚喇!
女:對唔住。

跟住真係聽唔清楚喇,之後我個 fd 叫我走,跟住出左去酒吧飲酒,

其實係佢自己不停隊自己,見到佢咁我都唔知講乜好,最後車左佢去我屋企。到今日我返工佢都未起身,如有消息我會再 Update Post!

第二帖[]

各位兄弟姊妹,我個 FD 岩岩打俾我,
原來佢今朝去左搵佢老婆(我出左門口返工、所以唔知)
佢話兩個傾左成 4,5 個鐘,
最後得出既結果係離婚收場,
層樓我個 FD 唔要、俾左佢老婆,
剩餘未供既每個月 1 人 1 半,
銀行存款 64 分賬,
老婆 6 ,我個 FD 4,
佢話會儘快搵律師搞。
不過暫時要住響我度先,
我話無問題……

我都係一個人住咋,有你做伴我開心 D 添呀!(p.s.差 D 唔記得同你地講,我個 FD係孤兒。)

第三帖[]

岩岩返到屋企即時向大家回報情況,
今日大約 1 點去左沙田市中心再傾過,
鑑於我尋晚都講左佢姦夫今日都會出席,
所以我個FD都叫埋我去,
我亦都參考左一位網友既意見,
準備左錄音筆去錄低成個回談過程(當然對方唔知喇…連我個FD都唔知)
去到目的地對方都仲未到,
所以我地叫左杯野飲飲住等,
等既過程中,我不斷游說我個FD,
一亳子都唔好分俾佢,依家個姦夫都出埋面,
個女人都係唔知悔改(個人認為:亦都無諗住改)
等左半個鐘,佢地兩個大搖大擺咁黎到,
我第一次正正式式睇清楚姦夫個樣,
講真,我覺得我個FD好樣過姦夫好多好多(唔通真條相由心生)
佢地兩個見到我在場都打左個突,
個女人竟然開口插我個FD,點解我會響度,
我話:你姦夫都響度喇,咁點解佢又要出現呀!如果你地要屈錢既話就過主,我響度你唔會得逞!(不屑的語氣)
已經開左錄音筆……

女:乜野姦夫呀,佢依家係我男朋友!
我:你地未離婚,男乜野朋友,姦夫就姦夫喇,俾我地捉姦在床都可以唔認,你真係好野!
姦夫:屌!佢地離婚係遲早既事,我認係姦夫呀,係你個FD on 9 o者,我地搞左咁耐佢都唔知,on 9 仔!
我:你真好野,面皮厚過包皮,咁你地通姦左幾耐呀!
姦夫:我地一齊左4年喇!
FD:咁你地依家想點丫!尋日已經簽左協議書喇!
女:我男友聽完之後話條件唔得,所以約你今日再傾下!
FD:我睇過都覺得份協議書有問題、兼且好唔公平!
女:你都覺得呀!拿!依家改都未遲架!
FD:係!我決定存款只係俾2萬蚊你,層樓我唔會再俾你,俾左2萬蚊你,我地以後一刀兩斷!
姦夫:屌!你係咪玩野呀!你地離婚唔撚駛俾贍養費呀!2萬…你當我地乞衣呀!
FD:我尋晚上網睇過資料,你地通姦,上到法庭我都唔駛俾贍差費!
姦夫:阿差知呀!你有証據咩!
FD:你地通姦既証據我係無,但係供樓、首期我有証據,每次我都係戶口過數,有根有據!
姦夫:屌!咁就跟你尋日份協議書咁分配!唔撚講咁多!
FD:唔得!我唔會跟尋日份協議書,份文件得我一個人有,我已經燒左!
女:咁你依家想點?
FD:2萬蚊,以後不相往還!
女:你即係玩野喇,法庭見,我要你每個月都俾贍養費我!
跟住就走Q左!

到依家我個FD都未知我錄左音,我諗住等佢

第四帖[]

岩岩同個FD返屋企執野,
點知上到去個女人換左鎖,
我地即時去搵開鎖佬開門(話我地唔記得帶鎖匙,費時麻煩)
入到去見到個姦夫D衫已經搬左過黎,
而我個FD既衫就俾個仆街掉晒(連鎖左個櫃既野都俾佢地爆埋)
我個FD淨係可以拎返佢D証件,
我跟手周圍影相,睇下遲小小可唔可以做証據,
大約逗留左半小時我地就走左,
跟住想問大廈管理處拎果日既錄影帶(但管理處話唔可以俾我地,因為係自隱權同乜野權既關係,唔係好記得。)總之就唔可以俾我地。
跟住搵埋另外一個朋友去左食飯,食飯既時候,個女人打俾我個FD,話會告我個FD爆格,我即時搶左部電話,你要報就報喇,我地未驚過,返屋企拎野都犯法呀?(屌完之後,另外一個朋友先講,你地可能真係犯法喎!層樓你個FD無名,佢可能有權告你地架啵!)
各位兄弟有乜意見。

明天我會同個FD去銀行拎晒D錢去黎,費時遲D會凍結戶口,跟住學師兄話齋,即時過大海一轉,跟住用我個名幫佢開戶口(紅簿仔同提款卡佢Keep)。話一晚輸Q晒D錢!

我個FD今次真係心死……仲有睇過晒大家既留言,佢話要做番 1 個真真正正既男人!

第五帖[]

個 FD 既外母外父琴晚去到我屋企門口,跪求我個 FD 唔好同佢個女離婚,佢地大約晚上 8:00 打電話俾我個 FD,話想同佢傾下佢地兩公婆既事,雖然係個女人做得唔岩,但畢竟兩個老人家山長水遠咁頻撲,我個 FD 問我可唔可以俾佢地兩個黎屋企,我話你決定喇!佢地話晒都係你既外父外母,傾清楚好應該既,唔好等佢聽晒個女既片面之詞,亦都可以俾佢地知道佢個女既醜事,不個我提醒你一句,你不如打電話問一問律師,睇下咁樣做對單官師有冇影響。

我個 FD 亦都接納左我既意見,律師話閒話家常係絕對無問題,但絕對唔好傾任何和解條件,亦都唔好將我地所講過,進行中既資料涉露俾佢地聽,你最多可以同佢解釋返你地點解會離婚,同未搵我之前所發生既野。

大約晚上 9:30 ,兩老終於到左我屋企,為免尷尬,小弟落左街等佢地自己慢慢傾。大約3 個鐘之後,我個 FD 打電話俾我,問我介唔介意送佢兩位老人家返屋企,佢地家住小西灣,就咁我車佢地兩公返屋企, 係車上佢地都有問我野:

外母:你同阿邊個好 FD 架?
我:係呀!都識左成 10 年喇!
外母:我都唔知點解搞成咁,問個女、個女又話我煩,乜都唔肯講俾我知!
我:伯友,我唔知你岩岩同我個 FD 傾左乜野,我亦唔知應唔應該由我把口講俾你知,但我可以好肯定咁講,一定係你個女錯晒。
外母:你當可憐下我兩老,可唔可以講你知既野俾我地聽。(已經開始喊緊)
我:你女婿前幾晚響屋企捉姦在床,你唔會唔知掛,過左幾日你個女仲要拖住條姦夫同你女婿講數分身家,佢有冇話俾你知呀?
外父:我真係估唔到自己個女可以咁賤格,有個咁好既老公都要搞搞震。
外母:不如你幫幫手勸下佢地唔好離婚丫!可能我個女都係一時貪玩又或者俾人呃,先會咁做咋。
我:世伯、伯母,佢同個姦夫一齊左 4 年喇,佢同我個 FD 拍拖一腳踏兩船既時間唔計,佢地都偷情左足足有 2 年!世伯,換轉係你,你會點決定呀?
突然架車入面好靜,之係聽伯母響度喊,都差唔多到喇!你地今晚早 D 訓唔好諗咁多喇,佢地離婚係事在必行,如果可以既話,你地同你個女傾下,再係咁生存落去,佢遲早自己害死自己!

雖然同世伯、伯母唔係咁熟,只係見個 2 次面,但係唔知點解我覺得佢兩位老人家好可憐,好可憐!兩老都已經頭髮白晒,但都要為左個女既婚姻而傷心,我覺得最慘既係錯晒係佢地自己個女身上,如果換轉係我個 FD 錯晒,我諗佢地會無咁傷心。由發生 D 件事到依家,我親身感受到唔只單單係兩位當事人自己既事,而係影響埋身邊的摯親。

所以各位有追開我 Post 既網友,已婚又好,未婚又好,千祈千祈唔好行差踏錯,一紙婚書雖然係微不足到,但背後既意義、責任卻重如泰山。唔好以為離婚只係兩公婆既事,有小朋友固然會真接受到影響,而你地身邊的摯親亦會牽連在內。

希望各位珍惜你地身邊的另一半,唔好為左一時開心、為左一個自己覺得係藉口的藉口而犯錯!

最後想送一句說話俾各位:
“”莫以善小而不為、莫以惡小而為之””

有諗下次再 Post 既時候,應該係單官司完結之後架喇!

第六帖[]

好多謝咁多位對我既支持,我就係呢件事上面的男主角,請容許我借個 FD 的 Account發留言:首先我的文筆沒有我朋友咁好,希望大家可以見諒!

我要在此衷心感謝我這個朋友,發生這件事之後,一直為我馬不停碲咁去找律師,陪我出去和前妻傾,讓出半間屋給我住,節目都幫我安排妥當,我最意想不到的是一個朋友比老婆還珍惜我,有這樣一個朋友,我可以話係夫復何求。

以下係我們暫時的稱呼:
男主角:我
我個朋友:B
前妻:F

相信好多網友都從 B 所寫的留言中得知有關最近所發生的事情,就正如 B 所講,佢所寫出來的留言,全是得到我的准許,(在此還 B 一個公道),他出留言前我亦都有睇過,我亦有將部份留言刪除,B 都一一照做!

唔好咁長篇大論,就講返我同外父外母傾過乜野俾大家知道,我記性無阿 B 咁好,只會盡量將我記得的對話寫出黎:

外母:個女同我講,你地要離婚,係咪真架?
我:對唔住阿媽,我地真係要離婚呀!
外父:真係唔可以補疚咩,點解要行到離婚哩一步呢?
我:我都唔想搞成咁,但我真係接受唔到,如果再一齊,我唔知以後點樣面對 F。
外父:一個男人要對老婆好,要對屋企負責任,先可以算得上係一個好男人,壞習慣可以改丫,點解要搞到離婚丫,改左之後咪可以開開心心囉,邊個無缺點架,又點會面對唔到呢?
我:可能係我唔適合佢喇,佢有第二個,咁即係話 F 再唔需要我喇!
外父:我個女唔係咁同我講,佢話你唔理佢,又多缺點壞習慣,覺得同你一齊好辛苦先離婚!
我:缺點同壞習慣我可能係有,但未至於令到我同 F 離婚。
我:阿爸,我做乜都係為左頭家、為左 F,我每個月份糧全部俾晒 F,我每個月既洗費只不過係 F 一個星期既洗費,我應承過你地會好好照顧 F ,響哩 2 年婚姻入面我刻盡己任,我無辜負阿爸阿媽你地倆個,不過可能我真係唔適合做人地個老公。
最後我:阿爸,我從小就係一個孤兒,結左婚之後我就當左你地係我親生父母,現在搞成咁,我都唔知講乜好!

3 個鐘頭傾左乜野真係唔係好記得,大約就係我以上所講咁,依家腦入面都係好混亂!

下次都係等 B Post 出黎好小小,話晒佢文筆好過我!

第七帖[]

第一, 好多謝多位網民既意見,我自己都估唔到開 1 個 Post 會有10 幾萬人次瀏覽,並且有咁多人支持我地。

第二, 我尋晚已經同個FD 商議左一晚,我地決定唔會 Post 佢地既相上網,各位網民亦都唔好再叫我地 Post 佢地張相。

第三, 我地知道各位網民都好戥我個 FD 唔抵,但係 D 件事始終係我個 FD 既家事,佢亦都估唔到有咁多人會聲援,人間冷暖,今次真係見到晒,佢亦都唔希望將件事情再化大(例如推上報等等),佢只係想儘快搞掂件事,重新生活,佢叫我同大家講句,請大家高抬貴手,現皆段唔想小事化大,有咁我無謂既小動作。

第四, 我地尋晚已經同一位朋友既朋友(律師)傾過,佢同我地講,佢話現皆段我地唔好上網再講 D 件事既進展,一切都等上完庭,搞掂晒先至好再討論,因為我地已經將依單野交晒俾律師去負責,多一個人知對方就會多一分防範,對我地勝訴既機會有影響(佢話依家有好多爛仔律師,乜野都做得出),不過大家放心,件事完左之後,我會將個情況同結果講返俾大家知。依家我地個律師已經開始做緊野,希望大家既情緒唔好咁激動住。

最後我地衷心多謝各位網民,我個 FD 只想快 D 完結 D 單野,網民既威力好大,雖然係個女人錯晒,但呢件事始終係佢地 2 個人既事,完結左大家都會一刀兩斷,佢亦都唔想個前妻永世都背付著一個咁醜惡既罪名,得饒人處且饒人,完結就始終會完結,完結之後就係新既生活,以前邊個岩邊個唔岩都好,過左去就由得佢過去喇!

希望各位會明白喇…

第八帖[]

上門尋仇

(以下對話因為我地有錄音,所以可以咁詳細回報返俾大家知)

自從同兩佬傾過偈之後,個女人直程殺到上我屋企狂插阿 A,插佢做乜同佢老豆老母講咁多野,依家好喇,佢地依家話唔認我係佢地個女,佢地話我係佢地既恥辱,為左唔想嘈住左鄰右理,迫於無奈俾左佢入屋傾,你都做到好絕丫,搵律師收返我層樓,而家我就黎連屋都無得住,你仲要離間我同屋企人既關係,你係咪想迫死我先開心丫?

小姐,層樓唔係你架,你無出過 1 毫子供過樓,仲有我無離間你同屋企人既關係,我只係將個事實講返俾佢地聽,(我幾驚阿 A會話俾佢知係我講架!好彩佢夠義氣自己哽埋隻死貓)我都無加鹽加醋說你的不是,你無屋企返咪去你男朋友度住囉,你根本就唔需要驚,仲有,而家我將所有野都交晒俾律師處理,見埋今次之後,我諗大家都唔好再見面。

最後我想同你講一句”樹欲靜而風不息、子欲養而親不在”,希望你會孝順父母多D,其實依件事上面佢地先至係最無辜既受害者,仲有,幫我同你男朋友講句多謝,如果唔係佢,我都唔會睇清楚你既為人。

容許我講多幾句,其實由始至終我都係咁愛你,雖然親眼見到你同第二個搞野,但係我都有諗過原諒你,同返你一齊,當我第一次同你傾條件果時,所有利益都係為左你,只要當時你同我講大家重新開始,我一定會原諒你;直至你同你男朋友一齊約我出黎傾果一刻,我已經完完全全對你死心,由果一剎那開始,我諗唔到藉口呃自己去原諒你!

撫心自問,我同你分開左哩段時間,我真係好輕鬆,可能我已經習慣左唔需要每日噓寒問暖、唔需要每晚煮飯做家務,我每日放工都好攰,但我哩2年入面未怨過一句。

搞到今日咁既田地,係你自己疚由自取,唔好怨天尤人,你今日點對我,將來會報應返響你身上,所謂 “今夕吾軀歸故土、他朝君體也相同” !

另見[]

外部連結[]

Advertisement